WorldSkills  қалалық өңірлік чемпионаты: «Болашаққа бастар жол – мектепке дейінгі тәрбиені дамыту»
2025 жылғы 26–27 мамыр аралығында Астана қаласында «Мектепке дейінгі тәрбие» құзыреттілігі бойынша WorldSkills қалалық өңірлік чемпионаты өтеді. Шара №73 «Аяулым» балабақшасында (Дауылпаз көшесі, 1) ұйымдастырылды. Чемпионатқа Астана қаласындағы төрт білім ордасынан — М.Жұмабаев атындағы Халықаралық жоғары колледжі, Еуразиялық гуманитарлық институтының жоғары колледжі, Астана халықаралық университетінің педагогикалық колледжі және «Менеджмент, бизнес және білім колледжі» ЖШС — барлығы 8 студент қатысады.
Бұл шара халықаралық стандарттарға сәйкес жоғары білікті мамандар даярлауға және кәсіби білім сапасын арттыруға бағытталған. Чемпионаттың басты мақсаты — мектепке дейінгі тәрбие саласындағы мамандардың дайындығын жетілдіру және WorldSkills кәсіби стандарттарын кеңінен насихаттау.
Қатысушыларға арналған тапсырмалар мектепке дейінгі ұйымдардағы нақты еңбек жағдайларын ескере отырып әзірленген: балалармен жұмыс істеу, оқу ортасын ұйымдастыру, ата-аналармен тиімді қарым-қатынас орнату, сондай-ақ инновациялық педагогикалық әдістерді қолдану дағдыларын тексереді. Жұмыстарын жоғары кәсіби деңгейдегі тәуелсіз сарапшылар — тәжірибелі сарапшы - компатриоттар бағалайды.